Paano ba Magsimula ng Isang Sari-sari Store?
Plano mo bang magsimula ng isang sari-sari store? Anu-ano nga ba ang dapat na paghahanda ng iyong sarili bago ka magbukas ng isang negosyo?
Narito ang ilang mga basic skills at qualities na maaaring gumabay sa iyong paghahanda!
Pagpapahalaga sa 3Ps: Pagbasa, Pagsulat, at Pag-compute
Ang pag-alam ng brand ng produkto, ang paglilista ng mga paninda, at ang pag-alam ng kabuuang kinita ay malalaman at magagawa sa tulong ng pagbabasa, pagsusulat, at pagco-compute. Kaya naman ito ang mga pangunahing kakayanan na mahalagang mayroon ka para mas mapangasiwaan ang negosyong sinimulan.
Maging masinop.
Ang pagiging masinop ay may maidudulot na maganda sa negosyo. Ang pag-alam ng takbo ng tindahan at pananatiling organisado ay ilan lamang sa mga pamamaraan ng isang masinop na negosyante upang maipagpatuloy at mapalago ang negosyo sa matagal na panahon.
Magkaroon ng katuwang sa negosyo.
Asawa, kapatid, anak, kaibigan, o kapamilya — ilan lamang sila sa mga maaari mong maging katuwang sa pagtitindahan. Maaaring maging mahirap ang pagsisimula ng isang bagong negosyo, makakatulong kung may katuwang ka na mapagkakatiwalaan. At ngayon, mayroon na ring mga institusyon at organisasyon na may mga programa para sa mga negosyanteng katulad ng mga sari-sari store owners para sa pagpapalago pa ng kanilang tindahan. Posible rin na mga kapwa sari-sari store owners ang iyong maging katuwang sa pagnenegosyo!
Related: Creating a Hapinoy Network of Sari-sari Stores
Handang matuto.
Bilang isang negosyante, mahalaga ang pagiging bukas sa oportunidad at pagkakaroon ng pagkanais sa pagkatuto tungkol sa pagtitindahan. Maaaring makatulong ang mga ito lalo na habang ikaw ay nagsisimula pa lamang. Ang mga eksperto sa negosyo at pati na rin ang mga kapwa mong sari-sari store owners ay siguradong may mga karanasan sa pagtitindahan kung saan ay pwede kang magkaroon ng dagdag kaalaman para sa pagpapatuloy ng iyong negosyo!
Related: HapiSkwela Goes Online!
Pagkakaroon ng pangarap sa negosyo.
Maaaring ituring na ito ang pinakamahalaga sa lahat. Bakit ka nga ba magtitindahan? Ano ba ang pangarap mo para sa iyong tindahan? Maaaring ito ay mapalago, makapagtayo ng karagdagang branch sa ibang lugar, o kaya naman ay makapagdagdag ng iba pang produkto o serbisyo na iaalok para sa karagdagang kita. Ano man ang pangarap mo para sa iyong tindahan, mahalagang magkaroon at panghawakan ito dahil maaaring itong maging inspirasyon na ipagpatuloy ang iyong tindahan.
Sabi nga sa isang kanta, “Magtanim ay ‘di biro”. Katulad nito, ang pagtitindahan ay hindi rin biro dahil ito ay isang negosyo na hindi lamang makakapagbigay ng dagdag kita sa iyo, ngunit makakapaghatid din ng serbisyo sa iyong komunidad. Sa mahalagang papel na ito na iyong gagampanan bilang sari-sari store owner, mahalaga na maihanda ang sarili sa mga basic skills at qualities na mga ito para sa pagsisimula ng iyong tindahan.
Handa ka na ba?
—
May sari-sari store ka na ba? Kung oo, tara na at maging parte ng Hapinoy, ang katuwang ng mga sari-sari store owners sa pagnenegosyo! Bisitahin lang ang Hapinoy Facebook Page sa www.facebook.com/Hapinoy.
At para sa iba pang tips sa pagsisimula ng isang sari-sari store, subscribe na sa Hapinoy TV!